Trst: Ministar Roćen učestvovao na redovnom godišnjem Ministarskom sastanku zemalja članica CEI

Ministar vanjskih poslova i evropskih integracija Milan Roćen učestvovao je danas u Trstu na redovnom godišnjem Ministarskom sastanku zemalja članica Centralno-evropske inicijative, na poziv predsjedavajućeg ministra vanjskih poslova Ukrajine Konstantina Griščenka. Tema sastanka bila je "Regionalna saradnja za evropsku integraciju i most između makro-regiona“.

Učesnici skupa su ukazali na značaj CEI kao važnog političkog foruma za jačanje regionalne saradnje medju zemljama Centralne i Jugoistočne Evrope i podršku koju pruža zemljama regiona na njihovom putu ka EU. Pozitivno je ocijenjen ukupan napredak zemalja članica CEI, koje nisu članice EU u procesu evropskih integracija, uz ocjenu da je svaki pojedinačan progres doprinio afirmaciji politike proširenja i uspjehu evropske politike. U odnosu na Crnu Goru pozdravljena je ponovljena preporuka EK, uz očekivanje da će pristupni pregovori sa Crnom Gorom biti formalno otvoreni do kraja danskog predsjedavanja EU.

Zajednički je ponovljena podrška projektno orijentisanom radu CEI u funkciji implementacije konkretnih oblika saradnje, kao i strategije jačanja makro-regionalne saradnje u cilju ukupnog socio-ekonomskog razvoja. U tom kontekstu potvrdjena je i puna opravdanast djelovanja CEI u skladu sa „Budvanskim preporukama“ usvojenim tokom predsjedavanja Crne Gore 2010. godine.

U svom obraćanju, ministar Roćen je istakao da se CEI potvrdio kao važan mehanizam regionalne saradnje na putu evropske integracije, koja je dobijanjem statusa posmatrača u GS OUN dobila mogućnost za veće prisustvo i šire globalno djelovanje na medjunarodnoj sceni. Istakao je da je Crna Gora iskreno posvećena svim procesima regionalne saradnje i da čvrsto korača ka članstvu u EU i NATO.

Ministar Roćen je imao niz neformalnih susreta na marginama sastanka, medju kojima i sa generalnim sekretarom CEI Gerhardom Fancelterom.