Ministar Ćulafić: Dijaspora je naš snažan oslonac

Ministar ekologije, održivog razvoja i razvoja sjevera Damjan Ćulafić učestvovao je na biznis forumu održanom u Beranama, u okviru Dana dijaspore 2025.

Pozdravljajući prisutne, ministar je zahvalio na pozivu i istakao da mu je posebno zadovoljstvo što upravo u Beranama ima priliku da govori o važnoj temi i da svoj skroman doprinos razmjeni ideja koje mogu unaprijediti razvoj sjevera.

„Dijaspora je naš snažan oslonac svojim znanjem, iskustvom i resursima može biti pokretač brojnih pozitivnih promjena. Naša je obaveza da te potencijale prepoznamo, podržimo i zajedno ih pretočimo u konkretne projekte“, poručio je Ćulafić.

Naglasio je da Ministarstvo ostaje otvoreno za saradnju sa svim pojedincima i organizacijama iz dijaspore, te da zajednički rad na unapređenju infrastrukture, zaštiti životne sredine i otvaranju novih radnih mjesta predstavlja put ka održivom i ravnomjernom razvoju cijele države.

“Kroz resor na čijem sam čelu još jasnije uviđam sve nedostatke koje sjever ima, od odliva stanovništva, loše putne povezanosti, nelegalnih deponija i nedostatka kulturnog sadržaja, do opadanja entuzijazma lokalnog stanovništva za promjene. Upravo zato se svakodnevno, kroz svoj rad, zalažem za njihovo prevazilaženje”, zaključio je ministar.