Predstavnici Ministarstva socijalnog staranja, brige o porodici i demografije, predvođeni državnom sekretarkom Mersidom Aljićević, boravili su u radnoj posjeti regijama Pulja i Bazilikata u Italiji, s ciljem razmjene iskustava i primjera dobre prakse u oblastima socijalne i dječje zaštite te unapređenja porodičnih politika i populacionih mjera.
Tokom posjete, ostvareni su značajni kontakti sa predstavnicima relevantnih institucija i organizacija koje djeluju u sektoru socijalne politike, gdje je bilo riječi o konkretnim mehanizmima podrške ranjivim grupama, razvoju usluga za djecu i porodicu, kao i mjerama koje različiti nivoi vlasti preduzimaju radi unapređenja demografske slike.
Poseban segment posjete bio je susret sa predstavnicama Međunarodne federacije poslovnih i profesionalnih žena Italije koja se nalazi u Materi, regija Bazilikata. Tokom sastanka predstavljeni su programi podrške ženskome preduzetništvu, kao i inicijative koje imaju za cilj ekonomsko osnaživanje žena i njihovo umrežavanje na nacionalnom i međunarodnom nivou.
Državna sekretarka Aljićević zahvalila se na pozivu i srdačnom gostoprimstvu, ističući značaj međunarodne saradnje u razvoju inkluzivnih i održivih socijalnih politika.
Iskreno se nadam da je ova posjeta početak jedne lijepe saradnje. Vjerujem da regije Pulja i Bazilikata mogu u Crnoj Gori prepoznati pouzdanog partnera za zajedničke inicijative koje doprinose kvalitetnijem životu naših građana, poručila je Aljićević.
Ministarstvo socijalnog staranja, brige o porodici i demografije nastavlja s praksom jačanja regionalnih veza i razmjene znanja, uvjereno da saradnja doprinosi kreiranju kvalitetnijih javnih politika i servisa za građane.